Meymunçiçəyi ilk dəfə insandan itə keçdi

İnsandan heyvana ilk meymunçiçəyinə yoluxma halı qeydə alınıb.

Bu barədə Parisdəki (Fransa) Sorbonna Universitetinin infeksion xəstəliklər üzrə mütəxəssislərinin “The Lancet”də dərc etdiyi araşdırmada bildirilir.

Məlumata görə, meymunçiçəyi iki kişi ilə birlikdə yaşayan itdə müəyyən edilib. Heyvanın onlardan biri tərəfindən yoluxmuş ola biləcəyi deyilir.

Kişilərin hər ikisinə iyunun əvvəlində meymunçiçəyi diaqnozu qoyulubmuş. İlk simptomlardan 12 gün sonra isə onların 4 yaşlı itlərində dəridə və selikli qişalarda çoxsaylı zədələr, o cümlədən iri irinli sızanaqlar və xoralar görünüb. Daha sonra itə PZR testi aparılıb və nəticələr müsbət olub.

Pasiyentlərin sözlərinə görə, onlar itə yataqlarında yatmasına icazə veriblər.

Həkimlər onu da vurğulayıblar ki, yoluxmuş itin meymunçiçəyi virusunu insanlara ötürə biləcəyi hələlik məlum deyil.

Orqanik.az